Á móti sól

Þegar ég var að stíga mín fyrstu skref sem áhugaljósmyndari fyrir hátt í 30 árum var mér sagt að forðast myndatökur á móti sól. Eflaust hafa mörg ykkar heyrt þetta líka.

Hins vegar er það svo að myndir teknar á móti sól eru einmitt oft á tíðum afar skemmtilegar og heillandi. Að vísu fer þetta líka svolítið eftir því hvert viðfangsefnið er. Til dæmis getur verið varasamt að taka portrett á móti sól nema maður vegi upp á móti baklýsingunni með flassi eða öðrum ljósgjafa, vilji maður ekki fá skuggamynd af viðkomandi. Á hinn bóginn geta skuggamyndir eða silúettur verið mjög áhugaverðar og myndir á móti sól boðið upp á fallega lýsingu og áhugaverða útkomu. Með reynslunni eykst skilningur manns á áhrifum birtunnar og eðli hennar og þannig lærir maður að nýta sér hana.

Hér fyrir neðan eru nokkur dæmi. Smellið á myndirnar og fléttið til að sjá skýringatextana með þeim.
—-

Hér tók ég á móti sól en smellti af þegar maðurinn í bláu úlpunni skyggði á sólina. Þá fékk ég ekki eins sterka birtu á móti – annars hefði fólkið orðið að skuggamyndum. Reykurinn frá kyndlunum gerir síðan birtuna enn dramatískari. Í eftirvinnslunni létti ég síðan á skugganum í shadows/highlights til að fá meiri teikningu í myndina.

Þessi mynd er tekin á móti sól og birtan fellur niður með því að beina linsunni svolítið niðurávið. Þannig fær maður döggina til að glitra fallega á haustlaufinu.

Hér er tekið á móti sól en ég læt hana vera utan við myndflötinn að ofanverðu. Annars hefði sólin orðið of ráðandi í myndinni og meiri hætta á endurkasti. Með þessu var eins og hrímið væri hreinlega glóandi á trjánum.

Silúetta á fjalli. Ljósmælingin er tekið frá skýjunum og hraði og ljósop miðað við birtuna þaðan.

Leave a Reply